Галоўная / Навiны / Навiны рэспублiкi
18.03.2021

Прапановы па заканадаўчых актах на 2022 год можна ўнесці на Прававым форуме Беларусі

Прапановы ў праект плана падрыхтоўкі праектаў заканадаўчых актаў на 2022 год можна ўнесці на Прававым форуме Беларусі, паведамляе БЕЛТА са спасылкай на Нацыянальны прававы інтэрнэт-партал.

"Нацыянальны цэнтр заканадаўства і прававых даследаванняў распрацоўвае штогадовыя планы падрыхтоўкі праектаў заканадаўчых актаў і ўносіць іх ва ўстаноўленым парадку на зацвярджэнне Прэзідэнта. Штогадовымі планамі таксама можа прадугледжвацца распрацоўка канцэпцый найбольш значных і складаных законапраектаў, якія ўносяцца на ўзгадненне кіраўніка дзяржавы. Пры распрацоўцы плана разглядаюцца прапановы суб'ектаў права заканадаўчай ініцыятывы, дзяржаўных органаў і іншых арганізацый, у тым ліку навуковых, грамадскіх аб'яднанняў, грамадзян, улічваюцца вынікі навуковых даследаванняў у галіне права і прававога маніторынгу", - гаворыцца ў паведамленні.

Цяпер Нацыянальны цэнтр заканадаўства і прававых даследаванняў распрацоўвае праект указа "Аб зацвярджэнні плана падрыхтоўкі праектаў заканадаўчых актаў на 2022 год".

Прапановы аб падрыхтоўцы законапраектаў (канцэпцый) з абгрунтаваннем неабходнасці можна выказаць на Прававым форуме Беларусі да 16 красавіка.-0-