Якія перспектывы супрацоўніцтва з рэгіёнамі Узбекістана бачаць у Гродзенскай вобласці, расказаў Караеў

7 ліпеня, Гродна /Кар. БЕЛТА/. Аб перспектывах супрацоўніцтва з рэгіёнамі Узбекістана пасля сустрэчы з прадстаўнікамі Самаркандскай і Андыжанскай абласцей расказаў журналістам старшыня Гродзенскага аблвыканкама Юрый Караеў, перадае карэспандэнт БЕЛТА. 

Старшыня Гродзенскага аблвыканкама падкрэсліў дзелавую хватку прадстаўнікоў рэгіёнаў Узбекістана, настрой на канкрэтныя практычныя крокі ва ўзаемадзеянні. "Яны прыехалі з гатовымі прапановамі, канкрэтнымі тэмамі. Адразу ж запісваюць канкрэтныя адрасы і асоб, з кім працаваць. Пераконваюць у тым, што нам не патрэбны пасрэднікі, мы павінны звесці вытворцаў і спажыўцоў", - сказаў Юрый Караеў.

"Узбекістан - гэта перш за ўсё цэнтр Сярэдняй Азіі. Гэта багатая па сваіх рэсурсах краіна. Галоўная прыкмета Узбекістана - гэта дэмаграфія, насельніцтва расце ў год па мільёне. Якая краіна свету можа гэтым пахваліцца?" - сказаў кіраўнік Гродзенскай вобласці.

Паводле слоў Юрыя Караева, прадстаўнікоў Узбекістана цікавяць у Беларусі, і ў Гродзенскай вобласці ў прыватнасці, пастаўкі сельскагаспадарчай прадукцыі, драўніны, мэблі і не толькі.

Перспектыўна і супрацоўніцтва паміж рэгіёнамі ў сферы сельскай гаспадаркі. "У нас шмат зямель, якія мы сваімі сіламі апрацоўваем. Землі ўсе дагледжаныя, прыгожыя. У нас ні адзін кавалачак не занядбаны і яшчэ шмат рэзерваў", - сказаў Юрый Караеў, дадаўшы, што ў партнёраў з Узбекістана ёсць інтарэс да інвесціравання і наладжвання сумеснай работы ў сферы жывёлагадоўлі.

Кіраўнік Гродзенскай вобласці звярнуў увагу, што супрацоўніцтва можа быць наладжана і ў частцы пастаўкі рабочай сілы на сельскагаспадарчыя прадпрыемствы. "Таму я прапанаваў, каб невялікая колькасць тых, хто імкнецца, у нас папрацавала", - расказаў ён.

Рэзюмуючы, Юрый Караеў адзначыў: "Адных цікавяць канкрэтныя тавары, другіх - развіццё тэхналогій у сябе. Яны цудоўна бачаць наш вопыт у машынабудаванні і ў прамысловай вытворчасці і хочуць, каб мы дзяліліся тэхналогіямі, стваралі сумесныя вытворчасці".-0-