Саўмін зацвердзіў комплекс мерапрыемстваў у сферы ўрэгулявання неплацежаздольнасці арганізацый

Урад зацвердзіў комплекс мерапрыемстваў, які забяспечвае рэалізацыю дзяржаўнымі органамі паўнамоцтваў у сферы ўрэгулявання неплацежаздольнасці. Гэта прадугледжана пастановай Савета Міністраў нумар 642 ад 30 верасня 2023 года, якая сёння афіцыйна апублікавана на Нацыянальным прававым інтэрнэт-партале, паведамляе БЕЛТА.

"Дакумент прыняты ў мэтах арганізацыі своечасовай сістэмнай работы дзяржорганаў па фінансавым аздараўленні праблемных арганізацый, прыняцці мер па папярэджанні (правядзенні працэдур) неплацежаздольнасці і банкруцтва, у адпаведнасці з нормамі закона ад 13 снежня 2022 года нумар 227-З "Аб урэгуляванні неплацежаздольнасці", - растлумачылі ў Мінэканомікі.

У пастанове, зыходзячы з паўнамоцтваў дзяржорганаў і мясцовых выканаўчых і распарадчых органаў, устаноўленых законам, дакладна рэгламентаваны іх дзеянні і тэрміны рэалізацыі.

Зацверджаны пастановай комплекс мерапрыемстваў змяшчае тры раздзелы. Першы - мерапрыемствы па папярэджанні неплацежаздольнасці і банкруцтва. Па гэтым напрамку зыходным пунктам з'яўляюцца вынікі правядзення ацэнкі ступені рызыкі надыходу банкруцтва і аналізу сваёй гаспадарчай (эканамічнай) дзейнасці.

У другім раздзеле адлюстраваны паўнамоцтвы дзяржорганаў па рэалізацыі мерапрыемстваў па забеспячэнні і правядзенні працэдур неплацежаздольнасці і банкруцтва ў адносінах да дзяржаўных і прыватных арганізацый. Адрэгуляваны тэрміны і ўзровень работы дзяржоргана па ўзгадненні планаў, у тым ліку папярэдніх, санацыі або ліквідацыі (і іх змяненняў і дапаўненняў), прадстаўленні кандыдатур часовых (антыкрызісных) кіраўнікоў і інш.

У трэцім раздзеле прадугледжаны мерапрыемствы, накіраваныя на прадастаўленне дзяржорганамі справаздачнасці па выкананні сваіх паўнамоцтваў.

Пастанова ўступіла ў сілу 1 кастрычніка 2023 года.-0-