Прэзідэнт Беларусі Аляксандр Лукашэнка 30 студзеня зацвердзіў рашэнне на ахову дзяржаўнай граніцы ў 2025 годзе, паведамляе БЕЛТА.
Кіраўнік дзяржавы, перад тым як паставіць подпіс на дакуменце, падкрэсліў, што гэта рашэнне не проста лінія дзяржаўнай граніцы на зямлі, па вадзе і ў паветры. "Гэта вельмі сур'ёзнае рашэнне па абароне суверэнітэту і абароне нашай дзяржавы", - звярнуў увагу Аляксандр Лукашэнка.
Прэзідэнт заўважыў, што ў абароне беларускіх рубяжоў у шырокім сэнсе задзейнічаны ўсе сілавыя структуры ад міліцыі да ваенных, паколькі забяспечыць ахову больш як 3,6 тыс. км аднымі пагранічнымі войскамі складана.
"Скажу адкрыта. Нараўне з абаронай дзяржаўнай граніцы з боку пагранічных войскаў найважнейшым пытаннем з'яўляецца тое, каб яны нас своечасова папярэдзілі аб пагрозах. Іншыя ведамствы таксама займаюцца гэтым, але перш за ўсё гэта задача нашых пагранічнікаў - папярэдзіць аб магчымых пагрозах нашай бяспецы. Тады, адмабілізаваўшы ўсе сілы, якія ёсць у краіне (ад міліцыі да арміі, Міністэрства абароны), мы зможам процістаяць праціўніку", - заявіў кіраўнік дзяржавы.
"Прэзідэнт Беларусі дэталёва і дакладна ведае абстаноўку, якая складваецца на дзяржаўнай граніцы, па перыметры нашай краіны. Сёння былі вызначаны задачы, мерапрыемствы па месцы, часе, па напрамках дзеянняў не толькі пагранічнікаў, але і ў цэлым сілавога блока, які працуе ў інтарэсах аховы дзяржаўнай граніцы", - растлумачыў, адказваючы на пытанні журналістаў пасля мерапрыемства ў кіраўніка дзяржавы, старшыня Дзяржпагранкамітэта Канстанцін Моластаў.
Паводле яго слоў, зыходзячы з асаблівасцей цяперашняй абстаноўкі і існуючай напружанасці вакол беларускай граніцы, у рашэнні аб яе ахове з'явілася шмат новага. "Але задача ў нас, пагранічнікаў, застаецца адна - гэта надзейная ахова дзяржаўнай граніцы", - сказаў ён.
Як растлумачыў старшыня ДПК, прыярытэтнымі задачамі органаў пагранічнай службы ў 2025 годзе будзе нарошчванне сістэмы сіл і сродкаў органаў пагранічнай службы, іх аснашчэнне сучасным узбраеннем і тэхнікай. У прыярытэце - удасканаленне баявой падрыхтоўкі ваеннаслужачых, палявой вывучкі манеўраных груп, забеспячэнне гатоўнасці беларускіх пагранічнікаў да спынення ўзброеных і іншых правакацый на дзяржаўнай граніцы. Прадоўжыцца далейшая рэалізацыя праграмы "Развіццё пагранічнай бяспекі Саюзнай дзяржавы", інжынернае абсталяванне рубяжоў, забеспячэнне планавай падрыхтоўкі мабілізацыйнага рэзерву.
Канстанцін Моластаў звярнуў увагу на тое, што ідзе бесперапыннае ўдасканаленне пагранічнай службы ў цэлым і ў тым ліку яе тэхнічнага абсталявання. "На сённяшні дзень ахова дзяржграніцы - гэта глыбока эшаланіраваная сістэма, г.зн. не толькі па самой лініі дзяржграніцы мы арганізавана нясём службу, але і ўмацоўваемся ў межах пагранічнай тэрыторыі", - растлумачыў ён.
Паводле слоў кіраўніка ДПК, органы пагранічнай службы пастаянна праводзяць мерапрыемствы па павышэнні эфектыўнасці аховы граніцы, нарошчванні інжынернай інфраструктуры, аснашчэнні ўзбраеннем і тэхнікай, удасканаленні баявой падрыхтоўкі. У рамках рэалізацыі Дзяржаўнай праграмы "Пагранічная бяспека на 2021-2025 гады" абсталяваны рубяжы аховы і аўтаматызаваныя пасты тэхнічнага назірання, разгорнуты сігналізацыйныя сістэмы, устаноўлены датчыкі, якія хутка разгортваюцца.
Акрамя таго, пачата стварэнне высокатэхналагічнага падраздзялення на польскім участку граніцы на базе пагранічнай заставы імя Героя Савецкага Саюза лейтэнанта Андрэя Кіжаватава Брэсцкай пагранічнай групы. Гэта закладзена ў адпаведнай праграме Саюзнай дзяржавы, разлічанай да 2027 года. Фарміраванне такога падраздзялення дасць магчымасць значна павысіць надзейнасць аховы і перайсці ад патрулявання ўчастка да рэагавання на развіццё абстаноўкі ў рэжыме рэальнага часу, а таксама аптымізаваць штатную структуру.
Канстанцін Моластаў растлумачыў, што адпаведная саюзная праграма кожны год удакладняецца, зыходзячы з актуальнай абстаноўкі і пастаўленых задач размяркоўваюцца існуючыя фінансавыя патокі. "Некаторыя лічбы, вядома, з'яўляюцца закрытымі, таму я не буду іх агучваць. Але ў цэлым скажу: мы ідзём па шляху ўдасканалення не толькі за кошт Саюзнай дзяржавы, але і бюджэту Рэспублікі Беларусь", - сказаў ён.
"Кожны год на кожным этапе мы ідзём наперад", - рэзюмаваў старшыня Дзяржпагранкамітэта.-0-